एक बार एक गांव मै एक कंजूस आदमी छो। ऊँकन धन खूब छो पण वो एक टको भी न उजाड़ै छो। वो कांई चीज मोल ले छो, तो ऊँ चीज को मोल सो ठोर पै करावै छो। पाछै ऊँ चीज नै ले छो। एक बार वो दस पण्डत जमाबा की बच्यार लियो। वो एक पण्डत नै बलार खियो कै, पण्डतजी, दस पण्डत जमाबा मै कतरो चून लाग जावैलो। पण्डत खियो, बीस किलो चून लाग जावैलो। कंजूस आदमी खियो, थोड़ा खाबाळा आदमी कोनै कांई? पण्डत खियो, दस आंदा नै जमा दै। कंजूस खियो, वांकी खुराक कतरी छै? पण्डत खियो, दस किलो। कंजूस खियो, पण्डतजी थे दस आंदा नै नूत दीज्यो।
पण्डत दस आंदा नै नूत दियो। दस आंदा कै लैरां दस आदमी ओर आग्या। कंजूस खियो कै, पण्डतजी मै म्ह तो दस आदमी बेई खियो छो। पण्डत बोल्यो कै, ये सगळा न्यारा-न्यारा गांव मै सूं आया छै। जिसूं एक आंदा नै एक आदमी लेर आयो छै। पाछै वो कंजूस बच्यार लगायो कै यां आंदा की बजाई तो बीस पण्डत जमा देता तो चोखा रहता। आपां बीस आदम्यां नै जमावांला अर नांव दस आदम्यां को हैलो।
सीख :- चत्‍तर भैंस, खाबड़ो लोटै छै।