धन्यधरा ढूँढाड़| आपणो ढूँढाड़ - धन्यधरा ढूँढाड़

डोकरा नै गेला मै पटक्यायो

webadmin — Wed, 30 Oct 2019 12:13:08 +0000

डोकरा नै गेला मै पटक्यायो webadmin Wed, 10/30/2019 - 17:43

एक बार एक मदन नांव को आदमी छो। ऊँको बाप बेमार छो। वो घाडो बेमार हैर मरग्यो। मदन को बायेलो रामू छो। वो रामू नै खियो, “कै मन तो बारा दन तक सराव कोनै अर तू म्हारा बाप नै गंगाजी मै पटक्या।” मदन, रामू नै करायो-भाड़ो देर गंगाजी खन्दा दियो। रामू गंगाजी तो गियो कोनै अर मदन का बाप नै गेला मैईं पटकर आग्यो।
रामू दूसरै दन मदन नै घरां दिख्यो तो, मदन बच्यार लगायो कै, गंगाजी जार आबा मै तो नरा दन लागै छै अर यो तो बेगोई घरां कियां आग्यो? एक दन मदन, रामू नै खियो कै, मन रात मै एक सपनो आयो अर सपना मै म्हारो बाप आयो अर वो खियो, “कै तू कस्या आदमी नै गंगाजी खन्दायो छो? वो तो मन गेला मैईं पटकर आग्यो।” रामू बोल्यो, “भाई थारी बात तो सई छै पण थारा बाप नै तो मर्यां पाछै भी अकल नै आई।” वो अतरो अण्डि आयो जतरो उण्डी जातो तो गंगाजी मैईं चल जातो। ईं बात सूं मदन बडो दुखी हियो कै जादा बोलबाळा अर दगाबाज आदमी पै कद्‌यां भी बसवास न करणो चाईजे।

सीख:- झूंटा बायेला पै बसवास न करणो चाईजे।

Main Image

Teaser Image

Literature Type

बाताँ

पेट मै भूचर्या

webadmin — Thu, 31 Oct 2019 05:49:49 +0000

पेट मै भूचर्या webadmin Thu, 10/31/2019 - 11:19

एक बार एक राजो छो। वो राजो स्याळा का दना मै रजायां भरवाबा की सोच्यो। वो ऊँका एक सन्तरी नै खियो कै, पन्दारा नै बलार ल्या। सन्तरी गियो अर पन्दारा नै बला ल्यायो। राजो खियो कै, “भाई आपणै दस-पन्दरा रजायां भराणी छै। तू थारा ओजार लियाज्यो अर अण्डैई आजाज्यो।” पन्दारो घरां जार अपणो खटकणो लियायो अर दो च्यार दन मै सारी रजायां बाणार घरां जार्यो छो। गेला मै एक नन्दी छी। नन्दी कै पैला डावा पै ऊँनै एक नार दीख्यो। नार दिखतांई वो पसेवां मै झांपाझोप हैग्यो। ऊँका पग थर-थर धूजबा लाग‍ग्या, जियां- “पगां की जमी नखळगी।” वो जगां को जगांईं उबो रियो। उण्डी नै नार सोच्यो कै, ईं आदमी का गळा मै जिंयान को ओजार आपां कद्‍यांईं कोन देख्या, आपां अण्डै सूं चग्यार यो आपां नै अबार मार देलो। ईं सगळी बारता नै एक स्याळ देखर्यो छो। स्याळ घणो हुंस्यार छो। वो एक अकल लगायो। वो जार पन्दारा नै खियो कै, “कांई बात छै? इंयां क्यूं उबो छै?” वो बोल्यो कै, सामै देख थारो बाप, अबार मन खाज्या छै। स्याळ सारी बात समजग्यो। वो भाग्योई जार नार नै खियो, राजाजी-राजाजी इंयां क्यूं उबा छो? नार बोल्यो कै, “ऊँका गळा मै देख कांई लटकर्यो छै?”
म्ह अण्डा सूं हाल्योर अबार मारै छै। स्याळ बोल्यो कै, “म्ह ईंसूं थांकी ज्यान बचाद्‌यूं तो?” नार बोल्यो, तू खवै ज्योई करूंलो। स्याळ बोल्यो, “म्ह थांका माथा पै सात जूती द्‌यूंलो।” वो बोल्यो ठीक छै। स्याळ ऊँका माथा पै बैठर सात जूती मार्यो अर बोल्यो, म्ह जार ऊँनै बातां लगाऊँ छूँ अर थे नखळ जाज्यो। स्याळ जार पन्दारा सूं बोल्यो कै, “म्ह ईंसूं, थारी ज्यान बचाद्‌यूं तो?” पन्दारो बोल्यो, “तू खवै ज्योई करूंलो।” वो बोल्यो, “म्ह थारो पेट खाऊँलो।” वो बोल्यो ठीक छै। अतरामैईं वो नार ओड़ी असारो कर दियो अर नार उण्डा सूं भागग्यो। अब स्याळ पन्दारा को पेट खाबा बेई ऊँकै च्यारुंमेर फरै। पन्दारा को जीव घोळ हैग्यो। वो एक बला सूं टळ्यो तो दूसरी आगी। अब वो डर को मार्यो लग-लग धूजै, पेट मै कुळ्ळाटी माचरी छी। ज्यूंईं स्याळ पाछै गियो अर आदमी अणाचुको जोर सूं पाद्‍यो। पादतांई स्याळ बोल्यो, “कै यो थारा पेट मै कांई बोलै छै?” पन्दारा नै बचबा को मोखो मलग्यो। वो बोल्यो, यार तू तो खालै। स्याळ बोल्यो, नहीं पैली तू बता? पन्दारो बोल्यो, खैद्‌यूं कै, हां यार बता, स्याळ बोल्यो, तो सुण म्ह छोटो छो, जद्‍यां मन म्हारा घरका घणा भूचर्या खुवाया छा अर अब वै बडा हैग्या वै सगळा इंयां खैर्या छै कै, तू म्हानै बारै नखाळ म्हे ईं स्याळ नै अबार खावां छां। स्याळ डरपग्यो अर बोल्यो कै, यार थारा हाथ नै थोड़ी देर पाछै लगालै, मन भाग जाबा दै। वो बोल्यो, अब ये कोन डटै। अतरामैईं स्याळ भागग्यो अर पन्दारो ऊँकी ज्यान बचार आग्यो।

सीख:- अकल बडी है छै।

Main Image

Teaser Image

Literature Type

बाताँ

समुदर खारो कियां छै

webadmin — Thu, 31 Oct 2019 05:53:07 +0000

समुदर खारो कियां छै webadmin Thu, 10/31/2019 - 11:23

नरा दना पैली की बात छै। एक गांव मै दो भाई छा। बडो भाई घणो भागवान अर छोटो घणो गरीब छो। बडा भाई कै कांई भी कमी कोन छी अर छोटा कन खाबा बेई दाणा भी कोन छा। दुवाळी को दन छो। बडा भाई का छोरा-छोरी फटाका छुडार्या छा। सारा गांव मै खुसी छारी छी। न्यारा-न्यारा पकवान बणार्या छा। पण छोटा भाई कै घर मै तो सण्णाटो छार्यो छो। ईं सब नै देखर छोटो भाई घणो उदास छो। छोटो भाई गेला मैर जार्यो छो, तो ऊँनै एक बूडो आदमी मल्यो। वो बोल्यो, “भाई आज तो दुवाळी छै सारो गांव खुसी मनार्यो छै अर तू घणो दुखी छै।” छोटो भाई बोल्यो, “कांई की दुवाळी, बाबा म्हारै घरां तो खाबा बेई चून भी कोनै।” म्हारी कोई भी सायता कोन करै। म्हारा छोरा-छोरी भूखां मरर्या छै अर म्ह कांई भी कोन कर सक्यो। बूडो आदमी बोल्यो, “बेटा म्ह थारी सायता करूंलो।” तू ईं लकड़ी का भारा नै म्हारै घरां मेल्या। छोटो भाई ऊँ लकड़ी का भारा नै मेलबा चलग्यो। बूडो आदमी खियो कै, “बेटा जंगळ मै तीन बोना आदमी रैवै छै, वानै पुवा घणा पसन्द छै। म्ह तन ये पुवा देर्यो छूँ, तू जार ये पुवा वानै दे दीज्यो अर वांकन सूं भाटा की जातण मांगलीज्यो।” छोटो भाई जंगळ मै गियो उण्डै ऊँनै तीन बोना मल्या। वो सारा पुवा वानै दे दियो अर वानै खियो कै, मन भाटा की जातण देद्‍यो। वै बोना छोटा भाई नै भाटा की जातण देर खिया, “ईनै फेरर तू ज्यो मांगैलो, या जातण वाई चीज नखाळै ली। काम मै लियां पाछै ईनै लाल लत्‍ता सूं ढक दीज्यो या बन्द है जावैली।”
छोटो भाई जातण लेर घरां आग्यो। घरां आर वो जातण नै फेरर खियो, जातण-जातण चावळ नखाळ। जातण महर चावळ आग्या। वो फेर खियो, जातण-जातण दाळ नखाळ, दाळ आगी। अब ऊँपै लाल लत्‍तो पटकर बन्द कर दियो अर सारा घरका दाळ चावळ बाणार खाया। अब नतकई नई-नई (दाळ चावळ, मसालो, चून अर घणी सारी चीजां) नखाळर बजार मै बेचबा लागग्यो। छोटो भाई खूब भागवान हैग्यो। निया लत्‍ता, मकान, डाण्डा-ढोर, यानी सब कुछ हैग्या बडो भाई सोच्यो कै, काल तक ईंकन खाबा बेई दाणा भी कोन छा अर आज ईंकै अस्यो कांई हाथ लागग्यो ज्यो अतरो भागवान हैग्यो। एक दन बडो भाई लुखर ऊँ जातण मै सूं सामान नखाळतो देख लियो। वो ऊँनै चोरबा की सोच्यो। वो रात नै उठर ऊँ जातण नै चोरर लियायो अर घर मै आर सारा सामान नै बांद लियो। सारा सामान नै लेर एक नाव मै बैठर, कोई टापू मै बसबा का इरादा सूं चाल पड़्यो। ऊँकी लुगाई सोची कै, यो आपां नै कोडै लेर जार्यो छै,“तो वो अपणी लुगाई नै बताबा कै ताणी वो जातण नै फेरर खियो, “जातण-जातण लूण नखाळ।” अब जातण सूं लूण नखळबा लागग्यो। ऊँनै जातण नै डाटबो कोन आवै छो। पूरी नाव लूण सूं भरर डूबगी। खेवै छै कै, “वा जातण आज भी चालरी छै, जिसूं समुदर खारो छै।”

सीख: -कद्‌यां भी चोरी न करणो चाईजे।

Main Image

Teaser Image

Literature Type

बाताँ

501 रफ्या देर बता

webadmin — Thu, 31 Oct 2019 05:55:48 +0000

501 रफ्या देर बता webadmin Thu, 10/31/2019 - 11:25

एक बार एक मांग-खाणो छो। वो मांगबा को काम करै छो। एक दन वो मांगतो-मांगतो एक रैलगाडी का टेसण पै चलग्यो। अब वो आरकसण आळा डब्बा मै बड़ग्यो। वो उण्डै मांगर्यो छो तो, एक जणो ऊँनै बोल्यो, “कै भाई चोखा हाथ-पग दे मेल्यो छै भगवान अर फेर भी तू भीख मांगर्यो छै। सरम नै आवै कै तन।” मांग-खाणो बोल्यो कै, “भाई यो म्हारो काम छै अर अब तू चुप रै।” वो आदमी उठर ऊँ मांग-खाणा का गाल पै एक थप्पड़ देफाड़्यो।
अब मांग-खाणो बोल्यो “म्हारै कियां दियो रै?” वो आदमी एक ओर थप्पड़ देफाड़्यो अर बोल्यो इंयां दियो। अब मांग-खाणो बोल्यो, “थारा बाप को‌ छै तो, अबकै देर बता?” वो आदमी एक ओर थप्पड़ देफाड़्यो। अब मांग-खाणो बोल्यो, “थारा बाप को‌ छै तो, अबकै ओर देर बता?” वो आदमी एक थप्पड़ ओर देफाड़्यो। अब मांग-खाणो बोल्यो, “थारा बाप को‌ छै तो, 501 रफ्या देर बता?” ऊँ आदमी नै 501 रफ्या देणा पड़्या। मांग-खाणो 501 रफ्या नै लेर घरां आर आणद सूं रियो।

सीख: कद्‌यां कोई को बरो नै सोचणो चाईजे।

Main Image

Teaser Image

Literature Type

बाताँ

लोबी पण्डत

webadmin — Thu, 31 Oct 2019 05:58:16 +0000

लोबी पण्डत webadmin Thu, 10/31/2019 - 11:28

एक गांव मै बदरी नांव को आदमी छो। वो एक गण्डकड़ो पाळ मेल्यो छो। वो गण्डकड़ो एक दन बेमार पड़ग्यो अर थोड़ा दना पाछै मरग्यो। गण्डकड़ा नै मर्यां पाछै बदरी भी बेमार पड़ग्यो। एक दन बदरी कै घरां एक पण्डत आग्यो अर बदरी नै खियो कै, तू पाप कर्यो छो, जिसूं बेमार हियो छै। बदरी खियो कै, ये पाप कियां मटैला। पण्डत बोल्यो “पूजा-पाठ कराबा सूं थारा सगळा पाप मटज्याला।” बदरी बोल्यो, पूजा-पाठ कुण करैलो? पण्डत बोल्यो, “पूजा-पाठ तो म्ह करद्‌यूंलो पण मन एक घोड़ा को मोल देणो पड़ैलो।” बदरी पण्डत नै एक घोड़ा को मोल देबा बेई खै दियो।
पण्डत झूंटमाट पूजा-पाठ कर दियो अर बदरी सूं पीसा मांगबा लागग्यो। बदरी ऊँका घोड़ो नै एक सहर मै बेचबा चलग्यो। एक हाथ मै घोड़ा नै पकड़्यां छो अर एक हाथ मै एक टोकरी पकड़्यां छो। पण्डत भी बदरी कै लैरै छो। बदरी खियो कै, यो घोड़ो बकाव छै, च्याराना को घोड़ो छै अर एक लाख की टोकरी छै, या टोकरी घोड़ा कै लैरै छै। जे ईं घोड़ा नै लेलो ऊँनै या टोकरी भी लेणी पड़ैली। थोड़ी बार पाछै एक आदमी घोड़ा नै अर टोकरी नै ले लियो। बदरी एक लाख रफ्या नै तो, थेला मै मेल लियो अर च्याराना पण्डत नै दे दियो। पण्डत च्याराना लेर घणो दुखी हियो अर मन मै बच्यार लगायो कै, कद्‌यां भी पाखण्ड नै करणो चाईजे।

सीख :- जस्या सूं जसी ई करणी चाईजे।

Main Image

Teaser Image

Literature Type

बाताँ

राणी को हार

webadmin — Thu, 31 Oct 2019 07:33:53 +0000

राणी को हार webadmin Thu, 10/31/2019 - 13:03

एक बार पैल्यां की बात छै। एक गांव कै बारै एक बड़ छो। ऊँ बड़ पै एक कागलो घुस्याळो बणार रै छो अर बड़ की जड़ा मै एक काळो स्यांप रै छो। वो स्यांप बड़ पै चडर कागला का बच्या नै खाज्या छो। कागलो ऊँ स्यांप सूं घाडो खुराब हैग्यो। एक दन वो कागलो एक राजा का महल मै चलग्यो। उण्डै राजा की राणी गळा का हार नै खोलर न्हाबा लागरी छी। कागलो ऊँ हार नै उठा लियो अर लेर बड़ ओड़ी आयो तो राणी भी कागला कै पाछै-पाछै बड़ कै तळै आगी। राणी को पाछ्यो करर, राजा का दरबारी भी उण्डै आग्या।
वो कागलो ऊँ हार नै बड़ की जड़ा मै पटक दियो। राणी ऊँ हार नै लेबा लागी तो, वो स्यांप बामी मै सूं बारै नखळ्यायो अर राणी नै खाबा भाग्यो तो, राजा का दरबारी ऊँ स्यांप नै मार दिया। स्यांप नै मर्यां पाछै कागलो निकां बडिया रियो।

सीख :- अकल बडी है छै।

Main Image

Teaser Image

Literature Type

बाताँ

चातरक बाण्यों

webadmin — Thu, 31 Oct 2019 07:37:30 +0000

चातरक बाण्यों webadmin Thu, 10/31/2019 - 13:07

एक बार एक राजो अर बीरबल दरबार मै बैठ्या छा। राजो बीरबल नै खियो कै, “ईं दनियां मै चातरक अर बावळ्यो कुण छै?” बीरबल खियो कै, “चातरक बाण्यां अर बावळ्या मुल्ला हैवै छै।” राजो खियो कै, तू दखार बता किया है छै। बीरबल एक मुल्ला नै अर एक बाण्यां नै दरबार मै बला लियो। बीरबल मुल्ला नै खियो कै, राजो थारी डाडी लेलो बता ईंको मोल कांई छै? मुल्लो डरपतो-डरपतो बोल्यो कै, दस रफ्या ल्यूंलो। बीरबल मुल्ला नै दस रफ्या दे देयो अर नाई ऊँकी डाडी बणा दियो।
अब बीरबल एक बाण्यां नै ल्यायो अर ऊँनै खियो कै, थारी डाडी को मोल बता अकबर बादस्यो लेलो। बाण्यों बोल्यो कै, म्हारी डोकरी मरी जद्‌यां बीस हजार रफ्या लाग्या छा। बीरबल बाण्यां नै बीस हजार रफ्या दे दियो अर नाई नै डाडी काटबा बठाण दियो। बाण्यां की डाडी कै नाई हाथ लगाबा लाग्योर बाण्यों नाई कै एक थप्पड़ देफाड़्यो अर बोल्यो, “कै तनै ठीक कोनै कै बादस्या की डाडी छै।” बाण्यां की बात नै बादस्यो सुण लियो तो, बाण्यां की डाडी बना काट्यांईं, बाण्यां नै दरबार मै सूं नखाळ दियो। बाण्यों बीस हजार रफ्या लेर ऊँकै घरां चलग्यो। बीरबल, अकबर बादस्या नै खियो कै, देखल्यो बाण्यों डाडी भी नै दियो अर बीस हजार रफ्या भी लेग्यो। चातरक बाण्यों छै या कोनै? अकबर बोल्यो, बीरबल थारी बात सई छै, बाण्यां घणा चारतक है छै।
सीख :- अकल बडी है छै।

Main Image

Teaser Image

Literature Type

बाताँ

बुडापो खोटो छै

webadmin — Thu, 31 Oct 2019 07:39:32 +0000

बुडापो खोटो छै webadmin Thu, 10/31/2019 - 13:09

एक बार एक गांव मै एक डोकरो छो। वो बेमार हैग्यो अर खाटला मै पड़ग्यो। वो खाट मै पड़्यो-पड़्यो घाडो दुखी हैग्यो। डोकरा का घरका ऊँकी सेवा करता-करता घाडा खुराब हैग्या एक दन ऊँ डोकरा का घरका बच्यार लगाया, “कै ईं डोकरा की खाट नै घर की महड़ी माळै डारद्‌यां छां।” ऊँ डोकरा का घरका ऊँकी खाट नै घर की महड़ी माळै डार दिया। डोकरा नै एक टोकरो दे दिया। ऊँनै खिया कै, तन भूख लागतांई टोकरा नै बजा दीज्यो। डोकरो नतकई भूख लागै जद्‌यां ऊँ टोकरा नै बजा दे छो। एक दन ऊँ टोकरा नै एक छोरो लेग्यो। डोकरा नै भूख लागी जद्‌यां। वो ऊँ टोकरा नै हेर्यो तो, टोकरो कोन लाद्‌यो। वो भूखां मरतो मरग्यो। डोकरा का घरका ऊँनै देख्या तो, वो मरेड़ो लाद्‌यो। पाछै डोकरा नै गांव का लोग-बाग देखर खिया, “महड़ी माळै डोकरो, डोकरा नै दे दिया टोकरो, टोकरा नै लेग्यो छोकरो, भूखां मरतो मरग्यो डोकरो।” पाछै डोकरा का घरका घणा पसताया।

सीख :- बडा-बूडा की सेवा करणी चाईजे।

Main Image

Teaser Image

Literature Type

बाताँ

स्याळ बणग्यो राजो

webadmin — Thu, 31 Oct 2019 07:41:10 +0000

स्याळ बणग्यो राजो webadmin Thu, 10/31/2019 - 13:11

एक बार की बात छै। एक जंगळ मै एक स्याळ रै छो। वो खुद तो सकार करै कोन छो अर दूसरा का करेड़ा सकार नै खार टेम-पास करै छो। एक बार ऊँनै खाबा बेई कांई भी कोन लाद्‌यो। वो भूखां मरतो एक गांव मै चलग्यो। जद्‌यां होळी को टेम छो। एक आदमी भगुनी मै लाल रंग गोळ मेल्यो छो। स्याळ भूखां मरतो खाबा का चक्‍कर मै ऊँ भगुनी मै जा पड़्यो तो, “स्याळजी तो लालचट्‍ट हैग्यो।” स्याळ तो उल्टोई जंगळ मै भागग्यो। जंगळ का जन्दावर स्याळ नै देखर बच्यार लगाया कै, आज तो जंगळ को राजो नार तो कोनै अर कोई दूसरो आग्यो।
सगळा जन्दावर स्याळ नै कोई कांई ल्यार खुवावै अर कोई कांई ल्यार खुवावै। स्याळ तो जंगळ को राजो बणग्यो। एक दन सगळा जन्दावर बच्यार लगाया कै, आपणा राजा नै ताज ल्यार पैरावां। सगळा जन्दावर गांव मै सूं एक बडो छाजळो ल्यार स्याळ का गळा मै पैरा दिया। अतरामैईं नार आग्यो। वो सांकड़ै आर जोर सूं दाड़्यो तो, सगळा जन्दावर छाना हैग्या। नार फेर जोर सूं दाड़्यो तो सबसूं पहली स्याळ उण्डा सूं भागग्यो। नार स्याळ कै पाछै भागबा लागग्यो। स्याळ दुर मै घुसबा लाग्यो तो, दुर सकड़ो छो, जिसूं छाजळो उळजग्यो अर जिसूं वो दुर मै घुस न सक्यो अर पाछै सूं नार आर स्याळ नै खाग्यो।

सीख: ओकात का स्याब सूं काम करणो चाईजे।

Main Image

Teaser Image

Literature Type

बाताँ

बना नीम को मकान

webadmin — Thu, 31 Oct 2019 07:42:28 +0000

बना नीम को मकान webadmin Thu, 10/31/2019 - 13:12

एक नगर मै दो सेठ रहछा। एक को नाँव घासीराम अर दूसरा को नाँव रामफूल छो। वाँ दोन्याँ नै धन-धोलत को घणो घमण्ड छो। एक दन घासीराम, रामफूल सेठ सूँ मलबा चलग्यो। घासीराम, रामफूल का मकान नै देखर अछम्बा मै पड़ग्यो। अतरो बडो मकान अर वो भी तीन मजली। गाँव का सगळा रामफूल का मकान नै देखता अर बडाई करता। घासीराम उल्टो ऊँकै घराँ आग्यो। घासीराम बडो उदास छो कै, रामफूल को मकान, आपणा मकान सूँ जोरदार छै। घासीराम ऊँका नोकर नै खियो, जे रामफूल का मकान नै बणायो छो, ऊँ कारीगर नै लेर आवो।

नोकर ऊँ कारीगर नै लियायो। घासीराम ऊँनै खियो, म्हारो मकान अस्यो बणावो जे सबसूँ चोखो अर तीन मजली है। मजदूर बनात खोदबा लागग्या। थोड़ी बार पाछै उण्डै घासीराम आग्यो। घासीराम कारीगर नै खियो, यो खाडो क्यूँ खोदर्या छै? कारीगर खियो, सबसूँ पहली मजबूत नीम, फेर पहली मजल, दूसरी मजल अर ऊँकै पाछै तीसरी मजल बणावाँला। घासीराम खियो, मन याँ सबसूँ काँई मतलब कोनै। थे तो सीदा तीसरी मजल बणावो अर ऊँनै अतरी ऊँची बणावो जतरी घासीराम बेई बणाया छा। नीम अर बाकी मजलाँ को पातक मत करो। कारीगर खियो, अस्याँ कोन है सकै। सेठ खियो, ठीक छै थे अस्‍याँ न बणा सकै तो, म्ह कोई ओर सूँ बणावाल्यूँलो। कारीगर खियो, ईं नंगरी मै काँई पूरा संसार मै कोई भी न बणा सकै। ऊँ सेठ को घर कद्‍याँ भी कोन बण सक्यो। जिसूँ खिया छै कै, कस्या भी काम नै पूरो करबा कै तोड़ी ऊँ काम की नीम मजबूत करणी चाईजे।

सीख:- हर काम की नीम मजबूत हैणी चाईजे।

Literature Type

बाताँ